GFS/FJS – La riviste sientifiche de SSTeF

La Societât Sientifiche e Tecnologjiche Furlane (SSTeF), dal 2001, an de fondazion, e puarte indevant in maniere continuative ativitâts di promozion de lenghe furlane, par mieç de promozion dal ûs de lenghe intai setôrs de ricercje, de cognossince e de divulgazion sientifiche. Di simpri, duncje, la SSTeF e contribuìs al disvilup e ae incressite dal status de lenghe furlane.
Tal ambit des sôs ativitâts, la SSTeF e publiche zaromai dal 2002 une riviste sientifiche bilengâl semestrâl (furlan-inglês), il Gjornâl Furlan des Siencis/Friulian Journal of Science, che, pe sô carateristiche di meti dongje une lenghe di minorance al inglês in maniere sistematiche, al à rapresentât e al rapresente ancjemò un câs unic tal panorame editoriâl talian.
Il Gjornâl Furlan des Siencis/Friulian Journal of Science al è une riviste multi- e interdissiplinâr, che e ospite articui di ricercje, rassegnis sul stât de ricercje, rassegnis lungjis, recensions di libris sientifics in furlan e inglese. I cjamps di ricercje tratâts intai contribûts publicâts, a spaziin, dome par fâ cualchi esempli, de fisiche ae biologjie, de economie ae medisine, de demografie aes neurosiencis, de matematiche ae inzegnarie, ae chimiche, fint a cjapâ dentri studis interdissiplinârs e riflessions linguistichis e glotodidatichis.
Intai agns passâts de sô prime ideazion, il GFS/FJS Il GFS al à contribuît a favorî la formazion, l’ûs e il consolidament di un lessic sientific furlan moderni; a creâ un archivi di ricercje, acessibil a studiôs e students; a rinfuarçâ la identitât culturâl dal Friûl intun contest globâl; a incressi il lustri de lenghe furlane.
Di là di jessi conservât te Biblioteche Civiche Joppi di Udin e in variis Bibliotechis de Regjon Friûl Vignesie Julie, il Gjornâl Furlan des Siencis/Friulian Journal of Science, al è presint intal catalic de Library of Congress di Washington, la biblioteche plui grande dal mont, e intal catalic de British Library. Cheste presince e garantìs ae riviste une visibilitât internazionâl, e sigure la conservazion di lunc periodi de publicazion tant che part dal patrimoni bibliografic globâl e e je un ricognossiment che al conferme il valôr sientific e culturâl dal progjet, metintlu dongje di publicazions di respîr mondiâl.
Cun di plui, il Gjornâl Furlan des Siencis/Friulian Journal of Science al è presint tes listis uficiâls des “Rivistis Sientifichis”, prontât de Agjenzie Nazionâl di Valutazion dal Sisteme Universitari e de Ricercje (ANVUR). La inclusion intes listis ANVUR e certifiche la cualitât editoriâl e sientifiche pai fins de valutazion de ricercje in Italie e si tradûs intune altre, indirete, incressite dal status de lenghe furlane.
Cundut di ducj chescj ricognossiments tant che riviste sientifiche, il Gjornâl Furlan des Siencis/Friulian Journal of Science al è tant plui di une riviste sientifiche: al è un laboratori linguistic e sientific che al unìs identitât culturâl e rigôr academic. La sô stesse esistence e testemonee che la sience e pues jessi comunicade cun eficacitât ancje doprant lis lenghis di minorance.
Ancje dal pont di viste materiâl, la SSTeF e à sielzût di publicazion il Gjornâl Furlan des Siencis/Friulian Journal of Science, cuntun formât di cualitât: la riviste si presente, di fat, tant che un libri in brossure di dimenson16x23.
In plui de publicazion in cjarte, fin dai prins agns di esistence dal Gjornâl Furlan des Siencis/Friulian Journal of Science, ancje se intal rispiet di un embargo di doi o trê agns a pet de publicazion dai numars, la SSTeF e à sielzût di meti a disposizion on line la version pdf dai articui, par fâ in mût che a sedin consultabii ai fins esclusîfs di documentazion e ricercje.