» Cunvigne 2020

Il 19^Congrès Anuâl de Societât si davuelzarà Sabide ai 12 di Dicembar dal 2020, in linie e in direte streaming achì sul sît de SSTeF.

La prolusion e sarà tignude dal Prof. Angelo Schiavi, de Universitât di Rome La Sapienza, sul argoment Frontiers in Particle Therapy: a Physicist Perspective.

Te sezion des Comunicazions a intervignaran Alessio Fornasin (Universitât dal Friûl), Marisa Michelini (Universitât dal Friûl), Rino Gubiani (Universitât dal Friûl), Stefania Troiano e Maria Rosita Cagnina (Universitât dal Friûl), Gloria Misson, Matia Mainardis, Alessandro Peressotti e Daniele Goi (Universitât dal Friûl), Enrico Peterlunger (Universitât dal Friûl) e Lorenzo Marcolini (AIF)

» Sclesis – RadioRAI

“Sclesis, cinc minûts di sience e tecnologjie” e je une trasmission radiofoniche realizade di Marco Tempo, in colaborazion cu la Societât Sientifiche e Tecnologjiche Furlane, pe RAI regjonâl dal Friûl Vignesie Julie.

Sience e tecnologjie in sclesis radiofonichis par svicinâsi a lis leçs che a guviernin il nestri mont e a lis creazions da l’inzen che a smicjin a fâ cressi il progrès de umanitât. Si fevele di machinis e di stelis, di bateriis e puints” (dal sît de RAI regjonâl dal Friûl Vignesie Julie)

Se tu âs pierdût cualchi pontade, tu puedis tornâlis a scoltâ e ancje discjamâlis dal sît de RAI Friûl Vignesie Julie.

Par scoltâ e discjamâ lis pontadis ladis in onde fin cumò diretementri dal sît de RAI, frache chi sot.

» La societât

In dì di vuê il disvilup de culture furlane e de lenghe furlane al pues dâsi dome se i aspiets plui impuartants de modernitât, tant a dî lis siencis, a vegnin doprâts par furlan. Ancje se in tal mont la comunicazion sientifiche si le fâs par inglês, par dut l’insegnament e la realizazion des siencis e des tecnologjiis a vegnin puartâts indenant intes lenghis nazionâls. Cun cheste convinzion e je nassude la SSTeF, associazion indipendente che riunìs ricercjadôrs, studiôs e professioniscj di diviers setôrs sientifics e tecnologjics, che àn a cûr la incressite de culture e de lenghe furlanis.
Lis finalitâts de SSTeF a son chês di promovi e disvilupâ la ricercje, la cognossince e la divulgazion sientifiche e tecnologjiche doprant la lenghe furlane.

» Ativitâts

Lis ativitâts di ricercje e di divulgazion sientifiche de SSTeF a son metudis in vore prin di dut in Friûl, ma ancje ator pal mont. A rivuardin i principâi setôrs sientifics dissiplinârs:

  • siencis esatis
  • siencis de nature
  • siencis de salût
  • siencis tecnologjichis
  • siencis economichis, sociâls e umanis indulà che si dopre il metodi sientific
  • gjornalisim sientific

Ogni an la SSTeF e ten un Congrès là che i siei associâts a presentin i lavôrs di ricercje plui significatîfs.

» GFS – FJS

Dal 2002, la SSTeF e publiche il Gjornâl Furlan des Siencis / Friulian Journal of Science. Il GFS/FJS al è une riviste sientifiche in lenghe furlane e inglese indulà che vegnin publicâts lavôrs origjinâi di ricercje su lis dissiplinis sientifichis e tecnologjichis plui avanzadis. Ducj i articui di ricercje a son a disposizion in version bilengâl furlan-inglês. Tal GFS/FJS a son publicadis ancje rassegnis sientifichis e recensions di libris sientifics.

La publicazion de riviste sientifiche Gjornâl Furlan des Siencis/Friulian Journal of Science al è un dai obietîfs strategjics de SSTeF

» Cunvigne 2019

Il 18^Congrès Anuâl de Societât si è tignût Sabide ai 30 di Novembar dal 2019, a San Zorç da la Richinvelde, tal Auditorium de Biblioteche, in vie Rome, 7.

La prolusion e je stade tignude dal Prof. Marco Poiana, ordenari di Siencis e Tecnologjiis Alimentârs te Universitât di Reggio Calabria, sul argoment Cualitât dai aliments tipics: un mût sientific par valorizâ lis produzions.

Daspò de prolusion, a son stadis tignudis diviersis comunicazions.

» Cunvigne 2018

Il 17^Congrès Anuâl de Societât si è tignût Sabide ai 27 di Otubar dal 2018, a Udin, tal Salon dal Popul di Palaç D’Aronco. Pal 2018, in ocasion dal 40^ inovâl de Universitât dal Friûl, in plui de session ordenarie, e je stade inmaneade une session speciâl di buinore, organizade in colaborazion cul CIRF-UNIUD.

» Devente soci

Devente soci de SSTeF. Complete la schede di adesion, e mandile a:

SSTeF
c/o CIRF – Universitât di Udin
Via Petracco 6
I-33100 UDINE
Italy

Ti informarìn de acetazion de domande e di cemût paiâ la cuote di iscrizion.

» Sience furlane

Temporâi fuarts, tampiestadis, burlaç, ploiis straordenariis cun Dario Giaiotti da le Agjenzie Regjonâl pal Ambient dal Friûl Vignesie Julie.

Viôt une des pontadis dal program di divulgazion sientifiche Sience Furlane.