La Societât Sientifiche e Tecnologjiche Furlane (SSTeF) e je nassude a Udin ai 17 di Zenâr dal 2001.

» La societât

In dì di vuê il disvilup de culture furlane e de lenghe furlane al pues dâsi dome se i aspiets plui impuartants de modernitât, tant a dî lis siencis, a vegnin doprâts par furlan. Ancje se in tal mont la comunicazion sientifiche si le fâs par inglês, par dut l’insegnament e la realizazion des siencis e des tecnologjiis a vegnin puartâts indenant intes lenghis nazionâls. Cun cheste convinzion e je nassude la SSTeF, associazion indipendente che riunìs ricercjadôrs, studiôs e professioniscj di diviers setôrs sientifics e tecnologjics, che àn a cûr la incressite de culture e de lenghe furlanis.
Lis finalitâts de SSTeF a son chês di promovi e disvilupâ la ricercje, la cognossince e la divulgazion sientifiche e tecnologjiche doprant la lenghe furlane.

» Ativitâts

Lis ativitâts di ricercje e di divulgazion sientifiche de SSTeF a son metudis in vore prin di dut in Friûl, ma ancje ator pal mont. A rivuardin i principâi setôrs sientifics dissiplinârs:

  • siencis esatis
  • siencis de nature
  • siencis de salût
  • siencis tecnologjichis
  • siencis economichis, sociâls e umanis indulà che si dopre il metodi sientific
  • gjornalisim sientific

Ogni an la SSTeF e ten un Congrès là che i siei associâts a presentin i lavôrs di ricercje plui significatîfs.

» Cunvigne 2018

Il 17^Congrès Anuâl de Societât si è tignût Sabide ai 27 di Otubar dal 2018, a Udin, tal Salon dal Popul di Palaç D’Aronco. Pal 2018, in ocasion dal 40^ inovâl de Universitât dal Friûl, in plui de session ordenarie, e je stade inmaneade une session speciâl di buinore, organizade in colaborazion cul CIRF-UNIUD.

» Par associâsi

Par associâsi ae SSTeF completâ la schede di adesion, stampâle e mandâle a:

SSTeF
c/o CIRF – Universitât di Udin
Via Petracco 6
I-33100 UDINE
Italy

Si vegnarâ informâts de acetazion de domande e di cemût paiâ la cuote di iscrizion.

» GFdS/FJS

La SSTeF e publiche dal 2002 il Gjornâl Furlan des Siencis Friulian Journal of Science. Il GFdS/FJS al è une riviste sientifiche in lenghe furlane e inglese indulà che vegnin publicâts lavôrs origjinâi di ricercje su lis dissiplinis sientifichis e tecnologjichis plui avanzadis. Ducj i articui di ricercje a son a disposizion in version bilengâl furlan-inglês. In ogni numar a son publicadis ancje rassegnis sientifichis e recensions di libris sientifics.

Il Gjornâl Furlan des Siencis Friulian Journal of Science al è un dai obietîfs strategjics de SSTeF

» Imprescj

Tai prins agns 2000 la SSTeF e à prontât un coretôr ortografic, che, al dopre il motôr Aspell, che al furnìs chês peraulis che par solit si lis pronunzie in maniere simil a la peraule falade.

Il COF (te so version atuâl 2.0) al funzione come estension di Microsoft Word 2003 e Microsoft Word 2007 sui sistemis operatîfs Microsoft XP e Microsoft Vista.

 

» Cunvigne 2017

Sabide ai 18 di Novembar dal 2017,  a Caprive,  te sale “Teodoro de La Tour” di Vile Russiz,  si tignarà  il 16^ Congrès Anuâl de Societât.

» Sience furlane 2.01

Temporâi fuarts, tampiestadis, burlaç, ploiis straordenariis cun Dario Giaiotti da le Agjenzie Regjonâl pal Ambient dal Friûl Vignesie Julie.

» Cunvigne 2019

Il 18^Congrès Anuâl de Societât si tignarà Sabide ai 30 di Novembar dal 2019, a San Zorç da la Richinvelde, tal Auditorium de Biblioteche, in vie Rome, 7.

Chest an la prolusion e sarà tignude dal Prof. Marco Poiana, ordenari di Siencis e Tecnologjiis Alimentârs te Universitât di Reggio Calabria, su Cualitât dai aliments tipics: un mût sientific par valorizâ lis produzions.

Daspò de prolusion, al sarà pussibil scoltâ diviersis comunicazions.

» Events inmaneâts de SSTeF

Vinars ai 12 di Avrîl dal 2019, a Udin, tal Salon dal Popul di Palaç D’Aronco si è tignût l’incuintri Siencis par Furlan.  Tal incuintri, a vignaran presentâts i doi numars dal Gjornâl Furlan des Siencis/Friulian Journal of Science dedicâts a Marzi Strassolt.