Presentazion


Parcè la SSTeF

In dì di vuê il disvilup de culture furlane e de lenghe furlane al pues dâsi dome se i aspiets plui impuartants de modernitât, tant a dî lis siencis, a vegnin doprâts par furlan. Ancje se in tal mont la comunicazion sientifiche si le fâs par inglês, par dut l’insegnament e la realizazion des siencis e des tecnologjiis a vegnin puartâts indenant intes lenghis nazionâls. Cun cheste convinzion e je nassude la SSTeF, associazion indipendente che riunìs ricercjadôrs, studiôs e professioniscj di diviers setôrs sientifics e tecnologjics, che àn a cûr l’incressite de culture e de lenghe furlanis.

Lis finalitâts de SSTeF a son chês di promovi e disvilupâ la ricercje, la cognossince e la divulgazion sientifiche e tecnologjiche doprant la lenghe furlane. La SSTeF e sosten dutis lis iniziativis che àn a ce fâ cu la informatizazion de lenghe furlane; e puarte indenant iniziativis par studiâ, difindi e promovi la biodiviersitât in Friûl; e sosten la publicazion di libris sientifics par furlan e la lôr traduzion par inglês; e met a disposizion borsis di studi par ricercjadôrs che si impegnin a publicâ i risultâts des lôr ricercjis ancje par furlan; e ten rapuarts cun lis istituzions e lis aziendis che in Friûl a lavorin inte ricercje sientifiche e tecnologjiche.

Il president

Marzi di Strassolt

Ativitâts

Lis ativitâts di ricercje e di divulgazion sientifiche de SSTeF a son metudis in vore prin di dut in Friûl, ma a vegnin sostignudis ancje ativitâts ator pal mont. A rivuardin i principâi setôrs sientifics dissiplinârs:

  • siencis esatis (matematiche, informatiche, fisiche, statistiche e v.i.)
  • siencis de nature (chimiche, biologjie, gjeologje, psicologjie e v.i.)
  • siencis de salût (medisine, veterinarie, farmacie e v.i.)
  • siencis tecnologjichis (inzegnerie, tecnologjiis agroalimentârs, architeture e v.i.)
  • siencis economichis, sociâls e umanis indulà che si dopre il metodi sientific (economie teoriche, economie aziendâl, economie di imprese, sociologjie, linguistiche, antropologjie, archeologjie, siencis juridichis e v.i.)
  • gjornalisim sientific

La SSTeF e publiche il Gjornâl Furlan des Siencis / Friulian Journal of Science, gjornâl sientific in lenghe furlane e inglese indulà che vegnin publicâts lavôrs origjinâi di ricercje e di divulgazion su lis dissiplinis sientifichis e tecnologjichis plui avanzadis. Ducj i articui a son a disposizion in version bilengâl furlan-inglês.

Ogni an la SSTeF e ten un Congrès là che i siei associâts a presentin i lôr lavôrs di ricercje plui significatîfs.