I fitoplasmis: agjents di malatiis des plantis

Ristrêt. Al è biel, vie pes fiestis de fin dal an, vê in cjase une plantute di stele di Nadâl. Il colôr ros des fueis (ma al sarès miôr dî des brateis) da la plante al confuarte il voli tal grisôr dal unvier. Par vêr chel che al ven vendût par lis fiestis al è un nanul malât e deformât. In nature la stesse plante sane e rive a cressi fintremai di cualchi metri di altece e no je par nuie robe di tignî intun vasut. La preseade stele di Nadâl e je malade di fitoplasmosi. Plui di mil agns indaûr in Cine, sot la dinastie Song, inte cort imperiâl a vignivin preseadis une vore lis peoniis cun lis rosis coloradis di vert e ancje chestis plantis a jerin maladis di fitoplasmosi (Strauss 2009). Magari cussì no, ma e je ancje une altre muse de medaie mancul biele. I fitoplasmis, che a causionin chestis variazions di forme e di colôr cetant preseadis, a fasin dams une vore grâfs ator pal mont tai vignâi, a ridusin la cressite de blave, a ruvinin coltivazions di piruç e di miluç, a causionin malatiis te soie, palmis, bagjigjis, olms e v.i. Tant par fâ cualchi esempli, tal 2001 un atac di fitoplasmosis tai miluçârs al à causionât dams par almancul 100 milions di euro in Italie e di 25 in Gjermanie. Une epidemie des palmis e à puartât problemis di survivence des popolazions tai Caraibis e in Afriche, là che la plante e proviodeve ae mangjative, al materiâl di costruzion e a cualchi palanche. Par di plui al somee che il probleme si ingrivarà cul cressi de temperadure globâl, almancul par il fat che i insets vetôrs dai agjents di chestis malatiis a podaran slargjâ lis zonis de lôr ativitât.

Peraulis clâf. Analisi molecolâr, candidatus, flavessence, MLO, patologjie.